НОВИ САД – Покраїнски секретарият за привреду и туризем нєдавно розписал перши явни поволанки з обласци креативней економиї. Як наглашел покраїнски секретар за привреду и туризем Иван Дьокович, циль додзельованя тих безповратних средствох, потримовка привреднїком котри през креативну економию и сами представяю важну розвойну часц цалосней привреди и поднїмательства у АП Войводини.
Креативна економия то свойофайтове злученє привреди, уметносци, култури и технолоґиї, а подрозумює процеси хтори настали як плод креативносци, иновацийох и творчосци, та облапяю материялизовану креативносц у продуктох з естетским, лєбо символичним характером, як цо то дизайн, архитектура, мода, виглєдовацки процеси, звуки, малюнки и подобне.
Дьокович наглашел же креативна индустия нє лєм часц привреди хтора може збогациц и адаптовац индустрийску продукцию и унапрямиц ю ґу иножемним тарґовищом, алє и нєзаобиходни фактор змоцнєня индивидуалней приватней инициятиви, поднїмательского духу, потребних иновацийох и сучасних валоризованих технолоґийох.
Конкурси отворени по 4. септембер того року, а мож их найсц на сайту Покраїнского секретарияту за привреду и туризем – www.vojvodina.gov.rs.