КУЛПИН – Пондзелок, 2. априла, скоро цалком згорела хижа Ондрея Маґловского у Кулпину, у хторей у тот час були його родичи и син.
Як пише на сайту „Гласу люду” (www.hl.rs), Ондрей ше зоз супругу врацал з роботи кед чул же у валалє вибухнул вельки огень. Як ше приблїжовали ґу огню, уж му доявели же гори праве їх обисце.
-Перше сом ше опитал чи дахто покалїчени, а аж потим яка чкода направена – гварел Маґловски и подзековал огньогасцом, сушедом и шицким людзом добрей дзеки котри пришли нєсебично помогнуц. Йому и його фамелиї уж обезпечене место у хторим буду пребувац док ше хижу нє оправи и оспособи за каждодньове биванє.
Огень виволала искра у коминє у лєтнєй кухнї, а остала зачувана лєм предня часц хижи. Направена велька чкода бо, окрем велїх особних и фамелийних предметох, згорела шицка архива котру Ондрей Маґловски роками зберал.
Ондрейово колеґове и людзе з Месней заєднїци Кулпин почали ше радзиц о гуманитарних акцийох у котрих би ше назберало помоц, о чим ше познєйше информує явносц.
Ондрей Маґловски активно допринєсол и музичней творчосци Руснацох, бо у своєй длугорочней роботи сотрудзовал з велїма рускима музичнима авторами на наших фестивалох.
