У чежких часох треба „збивац шори”

автор сен
1.3k Опатрене

У Руским Керестуре нєдавно премиєрно виведзена младежска представа „Боинґ-боинґ”, хтору по тексту Марка Камолетия режирал Владимир Надь Ачим, єдини школовани фахови режисер у рускей заєднїци. Того року ше наполнюю 20 роки од його дипломованя на Києвским державним универзитету театралней уметносци „Иван Карпенко Карий” у України, та зме ше з тей нагоди оглядли на його творчосц и обставини у хтрих робя нашо уметнїки.

Владимир народзени 1970. року у Кули, а основну и штредню школу,  напрям Система и орґанизация културних активносцох, закончел у Руским Керестуре. Студирал историю на Филозофским факултету у Новим Садзе, филозофию на Pontificia Universita Urbania у Риме, а дипломовал на Києвским державним универзитету театралней уметносци „Иван Карпенко Карий” у України, на напряме за ґлуму и режию. За 20 роки фахового анґажованя, Ачим за собу ма 73 проєкти, спомедзи чого 12 радио-драми, єдна кнїжка, два семинари о театралней дїялносци. Окрем порядного анґажованя у Руским народним театре „Петро Ризнич Дядя” и Драмским студию „АРТ”, з часу на час є гонорарно анґажовани як режисер у Театре Александра Духновича у Прешове.

УПОЗНАЛ ВЕЛЇХ ВИЗНАЧНИХ ФАХОВЦОХ З ОБЛАСЦИ ТЕАТРА

-– Студиї режиї тирвали пейц роки, спомедзи хторих штири баржей теория, а у пиятим року ше окончовало асистентску праксу и робело на дипломскей роботи. Асистентску праксу сом робел у Сербским народним театре у Новим Садзе при професорови Еґонови Савинови, котри преподава на Факултету драмских уметносцох у Беоґрадзе, а бул сом асистент и прекладатель госцови зоз України Виталийови Дворцинови. Сцем визначиц остатню лекцию хтору сом запаметал од професора, кед нам на додзельованю дипломох гварел „Ище нєшка нас оценюєм я и вашо професоре, а од ютра вас будзе оценьовац живот”. Ту бул барз у праву, алє медзи шориками нам дал ище єдно значне порученє – „керуйце людзох котри ше сплїхца зоз политику, котри свою кариєру правя прейґ политики, прето же до политики звичайно уходза людзе котри то нє робя зоз найлєпших намирох и любови и прешвеченя, алє зоз хасну”. Стало ше же ми такой перша животна лекция була праве тота – здогадує ше Владимир.

acim 12

Пре чежки економски условия у яких уметносц функционує, Ачим гвари же през праксу научел „оголїц идею до символа”, та же му за представу нє потребни вельки буджет.

– Найважнєйши ми идеї и идеали, же би представа мала дух хтори пренєше патрачом. У своєй роботи правим вельо компромиси, прекравам сценоґрафию зняту зоз пойда, шопкох, импровизуєм и зоз того пробуєм направиц уметносц. Мойо сотруднїки и я баржей уключуєме мрию, креацию и видзим же то може буц максимално одбавене – гвари наш собешеднїк.

КАЖДА ПРЕДСТАВА ТО КОМПРОМИС ДАТИХ ОБСТАВИНОХ

– Найсмутнєйши сом кед нє можем витвориц идеалну вариянту, кед у глави оперуєм зоз ню, а условия цалком процивни. Алє найлєпше мерадло то щири и спонтани реакциї ґлумцох и патрачох. Спомедзи своїх витвореньох бим видвоєл представу „Паридя”, представу „Жени” хтору сом робел у Сенти, а у Прешове ми мила представа „100 000”  хтора була виведзена аж 87 раз. Мойо стретнуце зоз класику була Костельникова „Єфтайова дзивка”, адаптация „Лєт над гнїздом куковки”, а окреме ми значни „Сабирни центар” Душана Ковачевича, дзе сом мал комплетну професийну екипу зоз Сербского народного театра – гвари Ачим.

Режисерска робота то и педаґоґийна робота, а наш собешеднїк ше потераз опробовал у режираню дзецинских, младежских, и озбильних театралних представох.

– Основни критериюм при виборе представи то же би вона була на уметнїцким уровню, потим можлївосц интерпретациї и кельо то интересантне за публику. Позитивне же познам своїх сотруднїкох и знам хтору улогу кому додзелїм, а потим их водзим по етапох, з тим же режисер, як у шаху, вше муши буц даскельо крочаї опрез цалого ансамбла прето же ше кажде з нїх подписує под свою улогу, а режисер ше подписує под цалосц и то велька одвичательносц – толкує Владимир и додава же поставянє представи завиши од обставинох.

– У Прешове сом поставел представу за 17 термини, углавним ше ми треба уклопиц до мешаца. Алє иншак у просеку потребне отримац коло 40 проби – перша етапа то анализа за столом, потим розпорядково мизансценски проби и вец кед ше представа цалком оформи, потребни голєм 10 проби за убавйованє. Но, шицко завиши од екипи, понеже найновши представи „Боинґ-боинґ”, як и „Зазбероваче труплох”, у хторей и я ґлумим, мали менєй цалосни проби – гвари Ачим.

НАУЧЕЛ СОМ РОБИЦ У СКРОМНИХ УСЛОВИЙОХ

З рока на рок обачиц неґативни тренд зменшованя буджету за културу у шицких єй сеґментох, та и за театер.

Obesenjak u NS– Нобеловец за литературу Миґуел Де Унамуно з єдней нагоди гварел  же театер єднак значни як цо значне одкрице колєса, лєбо огня за чловечество. Томас Ман гварел же театер ма моц єдну громаду претвориц до народу. Маме шветови приклад дзе македонски театер мал барз вельки уплїв на кодификованє свойого язика, а яка мисия театра при Руснацох? Мисия єдно, а перспектива друге. Мисия то бешедовац о найглїбших, найплеменїтших прикметох чловека, а мойо видзенє перспективи то же єй нєт, односно, я нє видзим шветло на концу тунела. Средства вше менши, а часи и обставини вше горши. Маме єдну косц над хтору ше грижеме, а тота косц вше менша – так Ачим описує терашню ситуацию у театре.

За 20 роки фахового анґажмана удало му ше назберац лєм дзевец роки стажу у РНТ „Петро Ризнич Дядя” и шейсц мешаци у Заводзе за културу войводянских Руснацох, а окреме визначує же є уж три роки нєзаняти, социялно нєобезпечени и здравствено нєосиґурани.

– Тераз ми найбаржей помагаю анґажмани у Прешове хтори ме финансийно покриваю, прето же там дас 10 раз плаценша робота режисера як у Сербиї. Там робота режисера вельо почитованша, иншак ше боря за каждого свойого сотруднїка, фаховца. Нє знам як ше ту зложели обствини же уж три роки ходзим по наднїцох. У Прешове ме любя прето же бешедуєме зоз заєднїцким язиком, закончели зме исту школу. Ґу тому, научел сом робиц у скромних условийох, народ барз добре прилапює представи и я ше там барз приємно чувствуєм и тот штредок ме барз инспирує – гвари Ачим.

Кед 2003. року постал директор РНТ „Петро Ризнич Дядя” Владимир ше упатрал на Театер Александра Духновича и нєпреривно учел. Понеже ше наша драмска дїялносц нє може ровнац зоз условиями яки маю у Прешове, упатрал ше у смислу репертоарней политики.

– Ми у Керестуре маме єдну з найвекших бинох у Войводини, хтору обдумал Петро Ризнич Дядя, лєм же до нєй длуго нє укладане и з часом препада. То нє прето же ше ю занєдзбало, алє прето же нєт средства. З оглядом на условия и скромни можлївосци, можеме робиц на добрей комуникациї медзи собу и зоз публику – бешедує Ачим.

Окреме ми мило кед видзим таку фестивалску атмосферу яка була на премиєрох представох „Боинґ-боинґ” и „Зазбероваче труплох” и барз сом ше крашнє чувствовал. Треба так предлужиц, а шицки зме свидоми же цо чежши часи, мушиме „збивац шори”. Нови часи накладаю нови темпа и приступи – заключує наш собешеднїк.

У ТЕАТРЕ ШЕ НЄ ЖИЄ ЗОЗ СТАРЕЙ СЛАВИ

– Прешол сом шицки етапи роботи, писанє текстох, драматизациї, ґлумел сом, режирал и участвовал у рижних комисийох. У театралней дїялносци ше нє жиє зоз старей слави, вше кед раз крочиш на сцену покладаш нови испит и мушиш буц вше лєпши. После телїх представох за собу, наградох и припознаньох можебуц ше нє мушим доказовац, алє голєм нє мушим спаднуц спод уровня хтори сом себе задал – гвари Ачим.

Na zurki u babi Juli

ПОВЯЗАНИ ТЕКСТИ