ЗОМБОР – Седмеро школяре штвартей класи ОШ „Петро Кузмяк” з Руского Керестура, зоз учителями Веруну Медєши и Славком Надьом, стреду, 22. марца, були у Велькей сали Городскей хижи у Зомборе на представи „Дава ше знац же найважнєйше здравє мац!”, хтору патрели вєдно зоз школярами з Дироню и зомборских школох.
Представу виведли волонтерки Дружтва за борбу процив рака зоз Зомбора Наталия Жуйович и Ваня Вукша, студентки на Учительским факултету у Зомборе. На интерактивни способ з дзецми освидомели теми о чуваню здравя, гиґиєни и еколоґиї.
Представу у рамикох Марца мешаца борби процив рака орґанизовало зомборске Дружтво за борбу процив рака и Город Зомбор, а представа на вецей заводи виводзена за ґрупи дзецох зоз шицких школох з местох Заходнобачкого округу.