СЕРБИЯ – Адвокати котри штрайковали штири мешаци, вчера конєчно почали робиц. Прешлого тижня Министерство правди и Адвокатска комора Сербиї посцигли догварки, та ушлїдзело прилапйованє вименкох Закона о явних новтарушох и Закона о обтоку нєрухомосцох, Закона о вонкасудским постуку, Фамелийного закона и Закона о нашлїдзованю, з хторима витворени найважнєйши вимаганя адвокатох.
Врацени им овласценя у правним дїлованю, а новтарушом тоти можлївосци у вельким чишлє утаргнути. Тиж так, вименки предвидзую и же павшална порция за адвокатох за 2014. рок будзе звекшана максимално 10 одсто у одношеню на 2013. рок.
За штири мешаци, кельо тирвал штрайк, коло 100 000 судзеня одложени, а вельке число випитованьох у полициї и тужительстве нє отримани.
– Спрам вименкох законох, єдини котри маю овласценя составяц правни роботи и акти то адвокати и гражданє. Гражданє сами, або з помоцу адвоката, можу написац текст контракту, а явни новтаруш лєм оверює, так же кладзе ткв. солемнизацийну клавзулу – потолковал за РТВ Деян Укропина з АКВ.