НОВИ САД – Особи котрим од початку рока вецей нє важа безплатни карти за городски превоз у Новим Садзе, годни их виробиц у фебруаре, гварела за РТВ Снежана Янкович з Городского транспортного подприємства (ГСП).
Безплатни карти за превоз у городским и пригородским транспорту маю право достац вецей катеґориї гражданох – дзеци до шейсц роки, старши од 65 роки, особи котри маю цистичну фиброзу, параплеґичаре, дистрофичаре, особи з почежкосцами у розвою, хоротнїки котрим пресадзени покрутки и котри ходза на диялизу, воєни инвалиди, як и члени фамелийох погинутих у войнох 90-их рокох.
Список вельо длугши, а у цалосци го мож опатриц на сайту www.gspns.co.rs у мению „безплатни карти”.
За тих котри у городским превозу плаца карту, цени исти як и прешлого року.