СЕРБИЯ – Значни процент гражданох Сербиї дума же за успих у живоце найзначнєйши партийни кнїжочки и вязи, а лєм 14 одсто видзи вязу медзи успихом и образованьом, указало виглєдованє хторе окончел Совит за реґионалне сотруднїцтво у новембере и децембре 2014. року.
Ґенерални секретар Совиту Ґоран Свиланович гварел за телевизию N1 же виглєдованє робене у цалим реґионє, а ґражданє оценєли же стан у їх державох барз подли. Указало ше же гражданє Сербиї найвекши песимисти, а после нїх то гражданє Горватскей и Босни и Герцеґовини.
Як найвекши проблем у живоце гражданє наведли нєзанятосц. Заняти ше обаваю же останю без роботи, а нєзаняти же нїґда нє достаню роботу.