НОВИ САД – У законодавстве Републики Сербиї дотераз направени значни пременки у напряме активного и ровноправного участвованя особох з инвалидитетом у дружтве, медзитим то у пракси ище вше нє витворене – оценює Покраїнски омбудсман з нагоди нєшкайшого Медзинародного дня особох з инвалидитетом.
Нєодвитуюци условия живота, високи процент нєзанятих, худобство, социялна нєвидлївосц и изолация – даєдни з проблемох з хторима ше зочую особи з инвалидитетом. Окрем стереотипох и предрозсудкох о тих людзох, дакеди постої и дупла дискриминация кед особа женского полу, лєбо припаднїк националней меншини.
По Законє о професийней рехабилитациї и обезпечованю роботи за особи з инвалидитетом, шицки роботодавателє котри маю вецей як 20 занятих муша анґажовац и особи з инвалидитетом.
По конєц новембра того року у Войводини евидентовани 4 220 роботнїки з инвалидитетом, а за цалосне применьованє Закона треба обезпечиц роботу за ище 1 400 особи. Реґистровани 7 278 нєзаняти особи з инвалидитетом, медзи котрима 2 279 жени, а по старосци – без роботи найвецей особи старши од 40 роки – сообщел з нагоди Медзинародного дня особох з инвалидитетом Покраїнски селретарият за привреду, обезпечованє роботи и ровноправносц полох.