Терезия Катона зоз Руского Керестура закончела Ґрафичне инженєрство и дизайн на Факултету Технїчних наукох у Новим Садзе. Катонова участвовала на велїх конкурсох, а єй робота замеркована. Єден од найпопуларнєйших сайтох за дизайн амбалажи и етикетох „Packaging of the world” обявел єй дизайн етикети за мед того року.
Роби у новосадскей дизайн аґенциї у ПопАрт студию як ґрафични дизайнер, цо подрозумює здумованє и дизайн лоґоа и амбалажи, корпоративного идентитету (дизайн меморандума, визит карти, коверти), преломи кнїжкох, робота зоз илустрациями. Терезия ше за дизайн почала интересовац у штвартим року ґимназиї и теди пренашла напрям хтори могол єй любов ґу рисованю прилагодзиц потребом тарґовищу.
‒ Перше роботне место ми праве у дизайн аґенциї у хторей тераз робим, алє робиц сом почала два роки пред тим. Як и шицки хтори починаю робиц у тим фаху, сцела сом випробовац як ше знаходзим у роботи, у пракси, так же сом почала робиц як фриленс дизайнер за особи хтори познам, а тиж и за клиєнтох хторих сом нашла прейґ Интернету.
УСПИХ ПРОВАДЗИ ВРЕДНИХ У РОБОТИ
Катонова инспирацию за роботу находзи на рижних местох, а часто провадзи и сайти хтори водзаци по питаню дизайн стандардох, єдни з нїх то „The Dieline”, „Smashing magazine”, „Artstation”, „Awwwards”.
– Участвовала сом на вецей розличних конкурсох, єден зоз успишних то студентски конкурс за найлєпши лоґо (2014. року) дзе сом достала перше место. Тиж так, награду сом достала и на конкурсу за найлєпши дизайн амбалажи за Карибик – пицу у Новим Садзе (2013), до 10 найлєпших сцигла сом з помоцу гласаня, а медзи три найлєпши места зоз гласом жирия. Дизайн етикети за мед сом робела у рамикох моєй фирми у маю того року, бо клиєнт дал скоро подполну шлєбоду цо ше дотика креативносци и идейох, могла сом ше у цалком препущиц мрийом. Як резултат настала етикета за хтору зме подумали же би могла буц компетентна и модерна и по шветових дизайн стандардох. Прето сом роботу послала єдному зоз найпопурарнєйших сайтох за дизайн амбалажи и етикетох „Packaging of the world”. После того як обявели мою роботу на своїм сайту, достала сом лєм ище єдно потвердзенє жe сoм нє погришела у вибору занїманя.
У „Smashing magazine” хтори важи за єден зоз популарних сайтох у обласци дизайна и програмованя, 2014. року обявени Терезийов календар, тот маґазин кажди мешац обявює коло 15 найлєпши дизайни календарoх зоз цалого швета.
ЄДЕН ДИЗАЙН ПОЛЄПШУЄ ДРУГИ
Од Терезиї дознаваме же робота напарта теди кед ше приблїжи хвилька же ю треба закончиц (deadline).
– Роботу ше намагам охабиц на роботи, алє часто ми ше случує же ми у думкох останю проєкти хтори треба докончиц. Мам позитивних колеґох на хторих можем вше раховац, так же вец стрес и други почежкосци лєгчейше подношим.
Реализация проєкту завиши од самого проєкту, алє и од инспирациї, вимоги клиєнта
и огранїченосци закончуюцого датума.
– Од дизайна завиши кельо ми треба часу за реализацию, дзекеди то єден дзень, дзекеди вецей, а дизайнованє мойого персоналного лоґоа тирвало штири роки. На роботи углавном мам активни штири до шейсц проєкти. Скорей сом нє могла задумац же бим робела вецей як єден дизайн у исти час, у тей хвильки мушим припознац же ми таки способ и баржей одвитує, понеже кед за одредзени дизайн нє мам инспирацию, єдноставно ше преруцим на дацо друге.
Дизайн як фах барз специфични прето же го нє мож научиц у правим смислу того слова. Вшелїяк же ше муша знац даяки основни принципи и правила.
– Пририхтованя за друкованє, ученє програмох, основи комбинованя фарбох и фонтох, та аж и психолоґия чловека, односно способ його роздумованя же би ше му зоз дизайном прицагла увага и же би запаметал одредзени бренд, то тоти основи хторе сом добре научела на факултету. Же би ше шицки тоти правила могли успишно применьовац, потребне вельо пракси. Тиж вельо помагаю фахово пракси у фирмох, я була на пракси и у новосадских фирмох, а тиж и у Нємецкей. Шицко тото уплївовало же бим розвила способносци тимскей роботи, научела прилапйовац критики и совити и у каждим смислу ше усовершела.
