БЕОҐРАД – У Сербиї ище вше барз присутни родни, етнїчни и други стереотипи и предрозсудки, та дистанца спрам дзепоєдних меншинох, наведла Поверенїца за защиту ровноправносци Невена Петрушич у звиту за 2014. рок, преноши Бета.
Прешлого року Поверенїк достал 666 притужби, найвецей таки хторим основа була национална припадносц лєбо етнїчне походзенє, потим од дискриминованих особох на основи здравственого стану и старосци. Кед слово о дискриминациї на основи националней припадносци, найвекша дистанца у Сербиї постої ґу Албанцом, Ромом, Горватом и Бошняком.
Виглєдованє хторе окончене медзи гражданами указало же найвекши предиспозициї за дискриминацию постоя спрам ЛҐБТ особох, припаднїкох других етнїчних заєднїцох и припаднїкох меншинских вирских заєднїцох, особох заражених зоз ХИВ-ом, Ромох и дзецох з почежкосцами у розвою.
Звит Поверенїка за ровноправносц за прешли рок указал же у шицких обласцох дружтва жени у нєвигоднєйшим положеню у одношеню на хлопох. То окреме заступене на тарґовищу роботи, у участвованю у одлучованю, та у економскей обласци.