БЕОҐРАД – Поверенїк за информациї од явного значеня Родолюб Шабич представел портал хтори гражданом оможлївює хаснованє, обробок и анализу податкох о роботи тей институциї, а хтори мож опатриц на сайтох www.otvorenipodaci.poverenik.rs и www.data.poverenik.rs
– Шицко цо держава роби плацене з кишенки гражданох, та прето у шоре же би вони и видзели цо власц роби. Окреме значне же тоти податки мож машински читац, односно же су нє преприповедованє, лєбо фотоґрафия информациї, алє же податки мож обрабяц и анализовац – гварел Шабич и здогаднул же таку комуникацию уж запровадзели Министерство нукашнїх дїлох и Министерство просвити.
На спомнутих сайтох єст 13 ґрупи податкох, медзи нїма жалби з обласци права на приступ информацийох од явного значеня, мири за унапредзенє явносци роботи, вимоги за приступ информацийом хтори придати Поверенїкови, та надпатранє запровадзованя Закона о защити податкох о особи.