НОВИ САД – Дочек Нового року на Площи шлєбоди у Новим Садзе нє будзе плацени з пенєжом Новосадянох, алє спонзорох, з чим ше зашпорує вецей як 19 милиони динари плановани у буджету за тоту подїю, сообщене концом прешлого тижня з Кабинета городоначалнїка.
У сообщеню прецизоване же орґанизованє дочеку спонзорую „Дунай осиґуранє”, „Гайнекен”, „Дженерали осиґуранє”, „Виктория ґрупа”, „Александар будовня”, „Ґаленс будовня ”, „Ерсте банка” и „ОТП банка”.
За новорочну ноц у центре городу буду поставени два бини – на централней городскей площи велька, а у улїци Лази Телечкого менша.
Початок програми на 21 годзин, кед на Площи шлєбоди перше наступи бенд „Диванхана”, потим „Ґарави сокак”, „Лав гантерс”, „Фрайли” и „Црвена ябука”, а програма будзе тирвац до двох годзин по пол ноци. У Улїци Лази Телечкого наступя диджейове.