До кулскей општини два перши места, Малацко пияти

автор зам
855 Опатрене

ВАЛЄВО – На вчера отриманей Републичней смотри рецитаторох у Валєве, рецитаторе з кулскей општини освоєли два перши места у своїх возростох, а Мирослав Малацко з Руского Керестура освоєл пияте место у катеґориї старшого возросту.

Перше место у старшим возросту и награду за найлєпшу сценску бешеду на Републичней смотри рецитаторох освоєла Миляна Нинич з Кули, а перше место у катеґориї штреднього возросту освоєла Владица Кляїч з Червинки.

На найвисшим змаганю рецитаторох у Сербиї, попри Малацка, по руски ше змагала и Валентина Михняк з Дюрдьова, у катеґориї штреднього возросту, котру за змаганє пририхтала Мария Самарджич.

Попри спомнутих Ниничовей, Кляїчовей и Малацка, з кулскей општини на Републичней смотри участвовали и Лїляна Кнежевич и Исидора Нинков у младшим, та Тара Божович у штреднїм возросту, шицки з Кули.

Миляну Нинич и Тару Божович за тогорочни циклус змаганя пририхтал Слободан Ноґавица, Владицу Кляїч Весна Чукович, Мирослава Малацка Ивана Дудаш, а Лїляну Кнежевич и Исидору Нинков Амалия Ковач.

На Републичней смотри ше змагали по 35 рецитаторе у младшим, штреднїм и старшим возросту, вибрани на селекцийох од школских по Покраїнску смотру у Войводини, односно на змаганьох у округох у узшей Сербиї.

ПОВЯЗАНИ ТЕКСТИ