СЕРБИЯ – По Уредби о енерґетично защиценим купцови, економски загрожени гражданє буду мац право на безплатни киловати струї и кубики ґазу, а количество завиши од числа членох ґаздовства и приманьох. Защиценим купцом рахунки за ґаз буду зменшани у сезони зогриваня.
Право на безплатни 120 киловати електричней енерґиї, лєбо 35 кубни метери ґазу маю
єдночленово ґаздовства чийо мешачни приходи до 13 595 динари, а мешачно троша до 480 киловати струї.
Фамелиї з двома и трома членми хтори маю приманя до 19 795 динари, а троша найвецей 640 киловати мешачно, можу задармо достац 160 киловати струї, лєбо 45 кубики ґазу.
Ґаздовства хтори маю штирох и пейцох членох годни задармо достац 200 киловати електричней енерґиї, лєбо 60 кубни метери ґазу, под условийом же маю приход менши од 25 990 динари. Фамелиї зоз шейсц и вецей членми, чий приход до 32 684 динари, задармо достаню 250 киловати стуї, лєбо 75 кубики ґазу.
Право на безплатни киловати и ґаз маю и фамелиї хторим утаргованє випоручованя струї и ґазу може загрожиц здравє и живот, а можу го витвориц на основи медицинскей документациї.
У державним буджету за помоц гражданом видвоєни вецей як 1,6 милиярди динари, а оценєне же тоту помоц буду хасновац коло 200 000 гражданє.