Жени буду ровноправни з хлопами у шицких сеґментох 

автор танюґ/зам
785 Опатрене

БЕОҐРАД – По Законє о ровноправносци женох и хлопох, хтори Влада Сербиї прилапела 2. фебруара, тераз будзе витворене ровноправне положенє обидвох полох у шицких сеґментох дружтва, оценєла подпредсидателька Влади и предсидателька Координацийного цела за родну ровноправносц Зорана Михайлович.

– З тим законом витворени подполно єднаки шанси за економски розвой и женох и хлопох у Сербиї. Женом вецей нє зошму поставяц питанє же кеди ше планую породзиц, лєбо при конкурованю за роботу вимагац же би послали фотоґрафию. Положнїци нє годни страциц роботу прето же постаню мацери – гварела Михайловичова.

Вона наведла же Закон предписує ровноправну учасц женох и хлопох у управяцких и надпатраюцих целох за образованє, науку, култури, инфоморванє и спорт, та и у медзинародних целох.

– После прилапйованя того закона вельо вецей поваги ше будзе давац превенциї насилства над женми, а нє же бизме ше, як дотераз, занїмали з пошлїдками. Окремна защита предвидзена за жени з инвалидитетом, жени на валалє, самохраних родичох и жертви насилства – гварела Зорана Михайлович.

ПОВЯЗАНИ ТЕКСТИ