ВЕРБАС – Директор Заводу за културу войводянских Руснацох мр Серґей Тамаш вчера нащивел Народну библиотеку „Данило Киш” у Вербаше, дзе о.д. директорки Библиотеки Милияни Радованович придал найновши и найзначнєйши виданя нашого Заводу.
Вербаскей библиотеки подаровани кнїжки „Червене пупче 1969-2012”, „Червена ружа 1962-2011” (вецей авторох, редактор Дюра Латяк), „Польодїлска лексика Руснацох у Войводини” Александра Мудрия, „Центурион” Юлияна Тамаша и „Ґерманизми у руским язику” Андреи Медєши.
Нащива директора Заводу за културу войводянских Руснацох була роботного характеру пред Централну преславу Националного швета Руснацох, а з Тамашом у Библиотеки були и членїца Управного одбору Заводу Александра Лендєр, предсидатель КПД „Карпати” др Деян Загорянски и представителька Општини Вербас Ксения Бенце.
