ЖАБЕЛЬ/ДЮРДЬОВ – Анї у єдним месце жaбельскей општини нєт окреме орґанизовани подїї за дочек Нового 2015. року, а центри Дюрдьова и Чурогу анї нє оквицени. У Жаблю и Ґосподїнцох лєм прикрашени древа з рижнофарбовима швичочками, а як гварели у месних заєднїцох (МЗ), таки стан пре нєдостаток средствох.
Нова предсидателька Совиту МЗ Дюрдьов Леона Виславски визначела же ше будзе закладац же би ше идуцого року центер валалу оквицело, а того року є нє оквицени бо за тото у финансийним планє нє бул опредзелєни пенєж.
Нови рок годно дочекац у векшини кафичох и ресторанох у општини, дзе у ресторанох буду грац бенди, а у кафичох за музику задлужени ди-джейове. Младши ше найчастйше одлучую за дочек у кафичох у своїх местох, велї нєшка вечар пойду и до Нового Саду, док старши за ресторани.
Медзитим, векшина Нови рок дочека у домашнєй атмосфери, з фамелию и приятелями, а звичайно на пол ноци вєдно виштреля и огньомет.