БЕОҐРАД – Пожива од марца по юний 2015. подрагшела за штири одсто, та за трошительну кошарку гражданє видвоюю 200 динари вецей як пред двома мешацами, указал мониторинґ ценох на прикладу 54 поживових артиклох, хтори орґанизовала Асоцияция трошительох Сербиї (АПОС).
Швиньске месо аж за 20 одсто драгше як у марцу, док сухомесово продукти и продукти з меса подрагшели штреднєза 8 одсто. За шунки и колбаси плациме сто динари вецей як пред нєполнима двома мешацами.
Мука, галушки и житарки подрагшели штреднє за осем одсто, а кукурична и житна мука драгши за 10 динари як у марцу, наводза з АПОС-у.
Преробена, змарзнута и швижа желєнява драгша за аж 12 одсто. Тото ше одноши на кромплї, цибулю, пасулю, шампиньони, алє и змарзнуту, конзервовану и преробену желєняву – мишану желєняву, гращок и мауну, односно парадичову юшку и огурки у дунцу.
Подрагшела и змарзнута риба за 30 до 50 динари, односно конзервована риба за коло 4 одсто, а мирую єдино цени млєка и продуктох з млєка.