БЕОҐРАД – За ютре, 15. априла, Здруженє синдикатох пензионерох Сербиї наявело протест пензионерох пре, як гварене, нєуставне и нєзаконїте зменшанє пензийох. Протест будзе на Площи Николи Пашича у Беоґрадзе на пейц до дванац.
– На тим протесту жадаме указац свойо нєзадовольство пре зменшанє пензийох и вимагаме же би нам ше врацело тото цо нам украднуте, бо зме свойо пензиї чесно заробели и нєзаконїто нам их зменшали – гварел предсидатель Здруженя синдикатох пензионерох Сербиї Милорад Вуясинович и здогаднул же Здруженє у новембру прешлого року Уставному суду Сербиї придало вимогу же би ше понїщел одлуку Влади о зменшованю пезийох.
– Таку ситуацию вецей нє може толеровац, бо пензионере вше баржей загрожени пре зменшанє пензийох и подрагшенє поживи, комуналийох и наяву подрагшеня струї – гварел Вуясинович прешлого тижня наявююци протест.