И у Онтарию инициятива за зберанє прилогох за керестурски „Русин”

автор зам
1.2k Опатрене

КАНАДА – И у обласци Онтарио у Канади, дзе жиє значне число Руснацох з наших крайох, иницироване же би ше и вони уключели до акциї за зберанє пенєжних прилогох за Фодбалски клуб „Русин” у Руским Керестуре, за оправянє и ушорйованє стадиону и просторийох на Ярашу – дознава Рутенпрес од єдного з иницияторох Гавриїла Колєсара, котри жиє у тей обласци Канади.

У тим напраме Гавриїл Колєсар Руснацом-виселєнцом у Онтарию, та и ширше, розпослал допис-поволанку же би ше зоз своїма прилогами, хто кельо може и жада, уключели до тей акциї.

Координатор тей акциї у Онтарию будзе Дюра Фекете, и сам дакедишнї длугорочни фодбалер „Русину” (як у допису пише Колєсар, за Русин бавел од 1966. по 1983. рок), котрому ше мож обрациц и придац му пенєжни прилог як помоц ФК „Русин”. Дюру Фекетового нашо людзе у Канади можу контактовац на тел.: 519 576 7806, лєбо на е-адресу segedizv@yahoo.com

У своїм допису-поволанки Гавриїл Колєсар надпомина же у Норт Бетлфорду, у саскачеванскей обласци, на нєдавно орґанизованим Балє под масками за „Русин” уж назберани 500 долари, з чого нащивителє подаровали 400, а 100 долари їх Руске дружтво. Руснаци зоз саскачеванскей обласци шлїдуюце друженє буду орґанизовац за дочек Нового року, на хторим знова буду зберац и пенєжни средства за ФК „Русин”.

Прето иницияторе тей акциї у Онтарию поволую заинтересованих най ше приключа, же би и з їх помоцу ФК „Русин” витворел лєпши и красши условия за роботу, „примерани 21. вику”.

„Кажди ваш долар будзе од велькей помоци керестурским спортистом, котри вам уж тераз дзекую на каждей добрей дзеки хтору укажеце з уключиваньом до тей акциї” – поведзене у допису-поволанки за помоц послатей Руснацом-вислєнцом у Онтарию.

ПОВЯЗАНИ ТЕКСТИ