СЕРБИЯ – Спомедзи шицких дзецох котри задоволюю формални условия за дзецински додаток, аж 59,4 одсто го нє достава, указую резултати виглєдованя УНИЦЕФ-у, окончене у сотруднїцтве з Министерством за роботу, обезпечованє роботи, борецки и социялни питаня.
То значи же дзецински додаток доставаю лєм 40,6 одсто дзецох котри сполнюю условия, а резултати виглєдованя указую же кажде 10. дзецко котре достава додаток походзи з богатей фамелиї.
Понеже програма дзецинских додаткох у Сербиї нє универзална, алє ше при додзельованю до огляду беру и приходи, маєтни стан и ище дзепоєдни условия, постої и можлївосц за гришки, лєбо манипулациї – даєдни ґаздовства нє доставаю дзецински додатки, гоч маю право, а даєдни го доставаю, гоч на тото нє маю право.
По словох ресорного министра Александра Вулина така ситуация пошвидко будзе пременєна, понеже планована пременка Закона о финансийней потримовки фамелийом з дзецми, хтори риши проблеми злохаснованя. Як гварел Вулин, тоти проблеми присутни остатнї штернац роки, алє то будзе виправене того року.