БРАТИСЛАВА/ГОРНЇ ЗЕМПЛИН – У Министерстве животного штредку Словацкей у Братислави концом марца представена колекционарска стриберна монета – Шветове природне нашлїдство: Карпатски буково пралєси.
Автор колекционерскей монети Карол Лїчко, чежка є 18 ґ, з радиюсом 34 мм и вредносц єй 10 еври. Предавацка цена монети у терашнїм виданю виноши 17,40 еври, у опреми 22,20 еври, а буду ю предавац лєм контрактни партнере Народней банки Словацкей. Пририхтує ше и другу – златну монету, з номиналну вредносцу 100 еври, хтора би мала буц видата у децембре того. року.
Шветове природне нашлїдство твори комплекс природних букових лєсох, котри од 2007. року унєшени до Списку шветового природного и културного нашлїдства УНЕСКОа, а 2011. року локалитет преширени на висини природних букових лєсох у Нємецкей. У сучасносци творя єден заєднїцки локалитет, з назву „Карпатски буково пралєси и стари лєси Нємецкей“.
Тото прейґгранїчне шветове нашлїдство ше у Словацкей состої зоз штирох самостойних локалитетох: Стужица, Гавешова, Рожок, як состойна часц Народного парку Полонини и локалитету Вигорлат, як состойна часц ХКО Вигорлат. Дальши шейсц у сушедней України (Чорногора, Кузий Трибушани, Мараморош, Стужица Ужок, Свидовец, Уголька Широки луг) и пейц локалитети у Нємецкей.
Карпатски буково пралєси характеристични по доминациї лєсового бука. Прето и на монети приказане розпадаюце древо з младнїками бука и буквицами. На другей страни монети рис-оштровид, як тиж типични житель карпатского лєса.