СЕРБИЯ – Синдикати роботнїкох ше закладаю же би ше у 2016. року минимални мешачни заробок звекшало за 3 000 динари, односно же би виношел 24 000 динари. Синдикално-економски совит ше о цени минималного заробку муши вияшнїц по 15. септембер, а кед нє будзе догварки, о тим одлучи Влада Сербиї, преноша медиї.
Терашня цена роботного часу 121 динар, а синдикати ше закладаю же би вона була 143,5 динари бо, як наводза, вельке число людзох жиє у худоби прето же достава минималну плацу, нєдостаточну за основни трошки.
Мининални заробок у Сербиї скоро найменши у реґионє и виноши 21 164 динари, цо коло 176 еври. У Словениї минимална плаца 784 еври, у Горватскей 374 еври, а у Македониї и Босни и Герцеґовини 200 еври. Менши минимални заробок од роботнїкох Сербиї лєм у Албаниї – 149 еври.