НОВИ САД – Податки Индексу дружтвеного розвою городох и општинох, хтори виробел Тим за социялне уключованє и зменшанє худобства при Влади Републики Сербиї, указую же у Новим Садзе вигодни условия за живот по питаню висини заробку, обезпечованя роботи, а Новосадянє и образованши у одношеню на остаток Сербиї. Медзитим, як неґативни боки визначени здравство и условия биваня.
Нови Сад спада ґу найрозвитшим городом и општином, понеже штреднї нето заробок виноши 47 502 динари, цо за коло 4 000 динари вецей у одношеню на штредню плацу у Сербиї. Ґу тому, 53,24 одсто людзох од 15 до 64 роки заняти, цо тиж вецей од републичного просеку, хтори 47,5 одсто.
Процент високообразованих Новосадянох висши у одношеню на други часци Сербиї, а то доприноши и квалитету живота. Медзитим, трошки за високе образованє у Новим Садзе високи и по жительови виноша 38 309 динари.
Здравство и здравствена защита ше указали як слаби точки Нового Саду, цо пошлїдок нєдостатку кадрох. Тиж так, условия живота нєдостаточно добри, понеже 97,79 одсто ґаздовствох прикапчане на водовод, а 81,92 на канализацийну мрежу.
Индекс дружтвеного розвою облапя шицки городи и општини у Републики Сербиї и раз рочнє ше го ажурира з новима податками.