РУСКИ КЕРЕСТУР – Совит Месней заєднїци (МЗ) Руски Керестур на своєй вчерайшей схадзки виражел вельке нєзадовольство же Општина Кула ище вше нє розписала явни набавки и конкурси за шицки плановани роботи у Керестуре з тогорочного самодоприносу, а на розполаганю прейґ 10 милиони динари.
Як поведзене на схадзки, понеже керестурски самодопринос виходзи концом януара идуцого року, можлїве же нєпотрошени пенєж хтори ше до ньго злїва нє будзе вихасновани, та заключене же би ше о тим барз пошвидко бешедовало з чолнїками Општини Кула.
Слово о тим же по нових законских предписаньох самодоприноси часц општинского буджету, а Месна заєднїца вецей нє ма право сама розписовац явни набавки и конкурси за його трошенє, алє то идзе прейґ Општини. Но, як поведзене, пенєж ище вше мож вихасновац, алє у поради з Општину Кула же би розписала явни набавки за предвидзени роботи, та конкурси за здруженя гражданох – за їх дотациї зоз самодоприносу.
Пре терашнї законски статуси месних заєднїцох, дзе су нє препознати як найменша єдинка локалней самоуправи, алє то општина, на схадзки ше наруцело и питанє доцильносци розписованя нового самодоприносу, кед МЗ у ситуациї же ма пенєжи – а нє може з нїма розполагац. О тим ище будзе слова на шлїдуюцих схадзкох Совиту, вироятно и на Зборе гражданох.
Медзи другима питанями, вчера найвецей бешедоване о можлївосцох и винаходзеню способу за одредзене софинансованє поставяня трафо-станїци у улїци Ирини Провчи (за беґельом), лєбо даякого другого способу за звекшанє електричней моци у тей часци валалу дзе и погон за продукцию меблю д.о.о. „Комфорт стил”, пре терашнє и будуце преширенє його роботи.
Попри терашнїх прейґ 40 занятих, спомнуте подприємство до конца рока обезпечи роботу за 50 роботнїкох, у планє дальше ширенє роботи, а постої можлївосц же кед у тей часци валалу будзе обезпечена достаточна моцносц струї, там свойо погони отворя и кооперанти „Комфорт стилу”.
Идея на схадзки Совиту потримана, а заключене же би ше у наступним чаше випитало чи и як МЗ може конкретно допомогнуц у єй витвореню.
