У Дюрдьове єст надосц наднїчарох, алє велї нє порихтани робиц шицки роботи як валалчан Дюра Уйфалуши. Вон нє виберни, алє барз вредни. Познати є як добри и совисни роботнїк котри нїґда нє пожнї, та уж длугши час ноши титулу найвреднєйшого и найглєданшого наднїчара у Дюрдьове.
Дюрда Уйфалуши народзени як шесте дзецко у дзешецчленей фамелиї Уйфалушових з Дюрдьова. У богатей фамелиї з дзецми, нє було розкоши, та родичи зоз сташима дзецми часто були на полю. И Дюра помагал, тельо кельо могол як дзешецрочни хлапчик, та часто после школи и през розпуст бул у хотаре. Начастейше ходзел ґазловац по такволаних „хижкох”, местох дзе ше на полю пресадзовало нашенє ґереґи. Влєце их зрезовал, а вєшенї вязал снопи кукуричанки, ламал кукурицу и руцал до чардаку. Тото цо нє могол сам, помагали му родичи, або старши браца.
– Нє уписал сом ше до стреднєй школи, бо зме мушели вельо робиц. Широ, я сцел робиц, и заробиц себе за живот. Кед сом наполнєл двацец роки, почал сом робиц и себе, алє сом вше помагал и фамелиї – гвари Дюра, задовольни же ше о себе вчас могол остарац.
ДОБРЕ РОЗШТУДИРАЛ ДО ЧОГО УЛОЖИ
З того цо заробел пред петнац роками, перше себе купел бициґлу же би нє ходзел пешо. И нєшка Дюра нє люби подли бициґли, та меркує же би вше була оправена и мала добри ґуми. Лєм на такей годзен швидко сцигнуц на конєц валала, або на польо. Бициґли и братом покупел. А на роботу вше одходзи у чистей шмати, та ше у ґазди преблєка. Гвари же нє люби по валалє ходзиц брудни, а на тото ище од дзецинства мерковала його мац. И нє лєм на тото. Любела же є вредни и сцели. Прето Дюра вше обритвени, а кед роби по слунку, вше у кишенки защитна масц.
И попри тим же Уйфалуши цихи и поцагнути, люби франтовац, и вше є нашмеяни. На роботи нїґда нє доганя, а за каждого ма порихтане красне слово. У сушедстве гваря же тоту його благосц препознали и дзеци, та кед им дацо треба оправиц, окреме бициґли, вше Дюру волаю. Сушед Чапко найволї кед му Дюра надує ґуми и потолкує му на цо муши мерковац, а о його добрих дїлох шведоча велї Дюрдьовчанє, окреме тоти котрим нє раз нашол мобилни телефон у хотаре и такой врацел.
Гоч нє ма роботи през цали рок, Дюра вше пришпорує за шицко цо му потребне за живот. У обисцу Уйфалушових жию шесцеро, кажде ма свой куцик, а вон свой цал ком реновирал. Вимуровал нови мури, положел облак, добре шицко изоловал, купел мебель, а чува и єден стари, красни орман хтори нашлїдзел од дїда. Браца и пайташе му помагали же би шицко ушорел так як сцел.
Прешлей єшенї себе купел нови шпоргет и телевизор, гоч гвари же без того шицкого мож жиц, док за щесце потребне цошка инше.
– Найволєл бим ше оженїц. Жену бим чувал од чежкей роботи и слунка, ходзел бим по наднїцох и робел, а вона би чувала обисце и дочековала ме – так Дюра задумує будучносц. Реални є, єдноставни и вше ма виплановане цо и кеди будзе робиц. И у обисцу су добре орґанизовани, та браца отримую заграду, кармя живину, а єден з нїх задлужени за кухню. Дюра ма найвецей роботи, бо є вше по наднїцох, и помага кед треба дацо купиц, або заплациц.
Сезона роботох Дюри Уйфалуша уж вецей як 30 роки почина вжиме, на початку рока, теди кед ше полнї мещки за ґереґи.
– На полю єст роботи по конєц октобра, а вец по Нови рок вше менєй. Но, я робим шицко, нє виберам. Найчастейше то польопривредни роботи, коло статку, або рубем древа, зруцуєм або лупам кукурицу… Кед ме волаю робиц, нє питам ше цо треба, лєм ше порадзиме дзе и на кельо годзин пойдзем – гвари Дюра, хтори кед треба, става и на штири годзин рано, а дому дакеди приходзи аж на пол ноци. Вистанє, алє гвари же волї так, як кед нєт роботи.
НЄ ЗНА ЯК ШЕ ТО ОДПОЧИВАЦ
Дюрови вецей раз понукане же би пошол робиц до иножемства, алє вон вше гуторел же за ньго єст роботи и у валалє. Вон часто орґанизує и зволує роботнїкох до наднїци, бо ґаздове знаю же вибере вредних наднїчарох.
– Нї зоз ким сом ше нє повадзел у роботи. Любим випочитовац каждого и намагам ше добре робиц. А робим так як ми поведза, и нїґда сом потераз нє остал нє виплацени – гвари наш собешеднїк. На питанє же кеди ше одпочива, з ошмихом одповед – док шпим.
Дюра гвари же нїґда анї хори нє бул, а дума же то дзекуюци тому же нє пиє и нє кури. Провадзи и руски емисиї, поряднє чита нашо новинки и кнїжки руских писательох, а кед ма часу, зайдзе и до КУД „Тарас Шевченко”. Того року планує пойсц на морйо, други раз у живоце. На таку драгу го поволали Хромишово, та муши понагляц справиц пасош. Гвари же нє зна як тот одпочивок будзе випатрац, бо є нє звикнути нє робиц. Та заш лєм го, якош, чека.
КОЛО ҐЕРЕҐОХ НАЙВОЛЇ РОБИЦ
Од початку рока поряднє роби у осемнац фамелийох у Дюрдьове. Найдлужей є на бостану у Гардийових и Хромишових дзе поряднє роби уж двацец шейсц роки. Та, заш лєм, припознава же му найчежше робиц влєце на фармох пре горучаву и спройносц, а найволї робиц на бостану. Теди му анї слунко нє завадза.
ОСТАЛ У ВАЛАЛЄ
Пред даскельома роками док ходзел на наднїцу, ґазда му понукнул же кед сце може пойсц на сезонску роботу до Австриї дзе ше теди оберало ягоди. Пенєж бул вельо векши як ту за исти час роботи, но Дюра, заш лєм, одлучел робиц у своїм валалє.
На роботу до иножемства послал свойо власного брата. Вон там нє лєм же ма сиґурну сезонску роботу, алє и плацене здавствене осиґуранє, та и Дюра задовольни, бо пред тим, як гварел, брат чежко доходзел до роботи.
