БЕОҐРАД – Нєшка, 10. децембра, Медзинародни дзень людских правох, хтори ше означує од 1950. року на основи Общей декларациї Зєдинєних нацийох о людских правох принєшеней 1948. року, а хтора перша припознала право шицких людзох на живот, шлєбоду и безпечносц.
Перши член Общей повелї ґарантує же „Шицки людзе народзени шлєбодни, маю єднаке достоїнство и права”, а тоти права реґулую числени медзинародни документи.
Сучасна медзинародна реґулатива людских правох и шлєбодох почина з Грамоту Зєдинєних нацийох зоз 1945. року, хтора дефинує потребу сотруднїцтва державох у ришованю медзинародних економских, социялних, културних, лєбо гуманитарних проблемох, та у унапредзованю почитованя правох чловека и основних шлєбодох, без огляду на расу, пол, язик, лєбо виру.
Грамота обовязує шицки членїци Зєдинєних нацийох же би робели на витвойованю нєобходних условийох за миролюбиви и приятельски одношеня медзи народами, а на основи почитованя началох ровноправносци и самоопредзелєня.