СЕРБИЯ – Фаховни синдикати у Сербиї ше зложели же Нарис закона о системи плацох у явним секторе спричинї горши материялни и роботно-правни стан занятих и наявели же нєшка од 11 до 12 годзин нє буду робиц доми здравя, шпиталї, суди, образовни институциї и установи култури и науки, сообщели Союз самостойних синдикатох Сербиї и Зєдинєни фаховни синдикат „Нєзависносц”, а преноша нашо медиї.
Предсидательство републичного Одбору синдикатох 21. януара принєсло одлуку о штрайку спозореня, а перши раз же шицки 13 фаховни синдикати на републичним уровню потримую штрайк, бо им нє ґарантоване же їх вимоги буду уключени до Предлогу закона о плацох у явним секторе.
На вчерайшей конференциї за новинарох предсидатель Синдикату занятих у здравстве Зоран Савич гварел же синдикатом доручени нови Нарис закона о системи плацох у явним секторе, а хтори скоро идентични як верзия о хторей розправял Социялно-економски совит и хтори министер финансийох Душан Вуйович нє прилапел.