РУСКИ КЕРЕСТУР – Месну заєднїцу (МЗ) Руски Керестур вчера нащивели предсидателька Управного одбору керестурского Еколоґийного руху „Желєни персцень” примариюс мр Лилияна Дюкич Соколов и предсидателька спомнутого Руху др Леона Доротич Ґутеша, дзе о.д. секретара МЗ Юлина Медєша упознали з дотераз поробеним на ришованю вецейрочного проблему з воду за пице у Керестуре.
Як познате, керестурска вода забранєна за хаснованє пре присутносц дзешецраз векшого количества арсену од дошлєбодзеного, прецо поставене и пилот-построєнє за пречисцованє води, виробени елаборат и перша часц документох за будуцу фабрику води, як поведзене – найважнєйшей намирнїци за людзох од родзеня до конца живота.
Соколова источашнє и предсидателька Комисиї за ришованє проблему з воду у Керестуре и зоз о.д. секретара МЗ догварене же би ше зоз шицкима компетентнима инстанцами за тоту обласц з уровню Општини Кула и валалу, пошвидко отримало заєднїцку схадзку пре пораду о дальших крочайох за обновйованє инициятиви за ришованє проблему з воду за пице. З тим вецей же, як гварене, до проєктох можлїве убудовйованє новей технолоґиї за пречисцованє води од арсену.