ВЕРБАС/КОЦУР – На Першей програми Радио-телевизиї Сербиї, у емисиї „Шареница“, внєдзелю, 2. юния, општина Вербас мала нагоду представиц шицки свойо потенцияли з котрима тота мултикултурална општина розполага.
Госци у емисиї при Слободанови Шаренцови и Ани Бабич були жени зоз Активу женох зоз вербаских месних заєднїцох, як и Актив женох КУД „Жатва“ зоз Коцура Коцана Колєсар и Мария Дудаш Фейса. Вони представели традицийни єдла националних заєднїцох котри жию у тей општини.
Милян Вуйович, предсидатель КУД гусларох „Вук Мандушич“ одшпивал писню, а параолимпиєц Милан Шолая зоз Коцура бешедовал у хторей дисциплини постал перши у Европи.
У емисиї госцовал и Ратко Бєлица котри представел шицки капацитети Центра за физкултуру, як и Боро Войнович, висши кустос Городского музею, котри бешедовал о акциї „Поволай сушеда до музею“. Директорка Туристичней орґанизациї Вербас Мария Златович Арсениєвич упознала явносц зоз манифестациями котри ше отримую у вербаскей општини.
Як ше зложели шицки учашнїки з Вербасу и Коцура, госцованє у тей емисиї було наисце красне дожице котре буду длуго паметац и споминац.