СЕРБИЯ – Того тижня ше и у Сербиї означує Медзинародни тидзень превенциї рака гарлочка плоднїци. З тей нагоди у школох, на факултетох, роботних орґанизацийох у Сербиї плановани рижни манифестациї, совитованя и семинари. Женом у локалних заєднїцом плановане дзелїц и едукативно-промотивни материял и информовац их о важносци препатрункох.
У нашей жеми коло 400 жени рочнє умре од рака гарлочка плоднїци, а на 100 000, тота хорота залапи коло 24 жени, указую остатнї урядово податки. Вецей як два трецини на препатрунок иду уж у фази кед хорота барз напредовала и приходзи до компликацийох, а фаховци гваря же хороту мож зопрец кед ше ю лїчи начас.
Окреме ше апелує на жени котри маю од 25 до 64 роки же би раз у трох рокох обовязно окончели превентивни препатрунок, такволани ПАПА-тест (Папаниколау тест).
– Алармантна ситуация нє лєм у нашей держави, бо є подобна и у сушедних, алє нам то источашнє и индикатор же треба швидко робиц на превенциї и вчасним одкриваню рака гарлочка плоднїци. Там дзе реґистроване менєй хорих, там и векша смертельносц, прето же жени до дохтора приходза кед уж позно – гварела за РТС шефица Канцелариї за скрининґ раку Верица Йованович.
Вона тиж гварела же того року превентивни препатрунки буду ключни и треба их окончовац у цалей держави, без огляду чи у општини орґанизована програма, бо шицки жени на нїх маю право.