ЧЕРВИНКА – Министерство младежи и спорту Републики Сербиї и Зомборски едукативни центер нєдавно урядово похвалєли нєформалну ґрупу гражданох „Владанов парк” з Червинки, за реализацию проєкту справох за бежбанє („теретани”) на отвореним.
У новембру 2014. року у Червинки направени „Владанов парк”, як здогадованє на Владана Йовановича, Червинчана котри погинул у транспортним нєщесцу у ЗАД. Инициятиву за правенє того парку порушали Владимир Нановски и Драґиша Дюричич, а з петицию их потримали 558 гражданє.
У „Владановим парку” поставени дзецински справи – два колїмбачки, спущовалка, ракета, гомбалка, направени спомин-чоп зоз швичнїками, украсна студня, лавочки, а тиж и проєкт „теретани” на отвореним, ткв. „стрит воркаут теретани“.
Проєкт реализовани у сотруднїцтве з Аґенцию за розвой Општини Кула и Зомборским едукативним центром „Млади закон“. У вибудови парку участвовали и велї гражданє, а материялна помоц сцигла з цалей Сербиї, Нємецкей и ЗАД.