НОВИ САД – Волонтерски центер Войводини (ВЦВ) отворел сезону приявйованя на медзинародни волонтерски кампи, хтори буду отримовац углавним влєце – од юния по авґуст. У Руским Керестуре ше тиж пририхтує уж традицийни камп, хтори того року будзе од 4. по 17. юлий.
Кампи тирваю коло два тижнї, а їх циль же би волонтере помагали локалней заєднїци у ришованю даякого конкретного проблему. Зазберую людзох з рижних державох, котри вєдно жию, робя, чераю искуства и здобуваю нови, цо тиж причини орґанизованя кампох.
Теми можу буц рижни, а кажде ма нагоду вибрац камп у складзе зоз своїма интересованями и жаданями. То можу буц роботни, еколоґийни, уметнїцки, едукативни, реставрацийни, кампи на хторих волонтере робя з дзецми, особами з почежкосцами у розвою и подобне.
У Руским Керестуре ше отримує Медзинародни волонтерски камп з назву „Summer in Ruski Krstur“ („Лєто у Руским Керестуре”), а дотераз на нїм участвовали волонтере зоз рижних жемох: Французкей, Италиї, Шпаниї, Ческей, Македониї, Горватскей, Русиї, Турскей итд.
Попри роботох на ушореню валалу, на Кампу того року заплановани и роботнї на хторих ше волонтером укаже традицийни єдла и обичаї нашого народу и Войводини, та други активносци з хторима ше волонтере упознаю з Керестуром и руску заєднїцу.
Вецей о волонтерских кампох и можлївосцох за участвованє мож видзиц на сайту www.volontiraj.rs .