ВЕРБАС – Вчера у просторийох КПД „Карпати” у Вербаше отримана конститутивна схадзка Одбору за образованє Националного совиту Руснацох у новим зволаню, на хторей присуствовали шицки члени Одбору.
Предсидателька Одбору Мелания Римар визначела же попри предлуженя континуитету роботи прешлого, пред терашнїм Одбором ище и вецей роботи и активносци. Як найзначнєйши наглашела акциї вязани за уписованє наших дзецох до предшколских установох по местох, цо будзе приоритет у роботи Одбору, алє и цалей нашей заєднїци, у чим вельку улогу маю и родичи предшколских дзецох.
Одбор прилапел Дїловнїк о своєй роботи, а у обсяжней дискусиї шицки члени дали велї конструктивни предкладаня за план роботи, дзе предвидзене и стретнуце дзецох з руских дзецинских заградкох, участвованє у стретнуцу руских школох, Одбор будзе робиц на промоциї Ґимназиї у Керестуре, планує орґанизовац Лєтню школу, участвовац на семинарох за просвитних роботнїкох, орґанизовац семинар, чия тема будзе одредзена познєйше, а предложене и же би буджет Одбору за тот рок бул коло милион 500 000 динари.
Члени Одбору за образованє НС вчера єдногласно потримали Молбу Школи за основне музичне образованє Кула (ШОМО), же би ше зоз Школу „Петро Кузмяк” подписало спорозуменє о пребуваню керестурского Оддзелєня у єй просторийох, як сиґурносц же воно и надалєй будзе робиц у Школи „Петро Кузмяк”.
На вчерайшей схадзки Одбору у Вербаше присуствовали и предсидатель Вивершного одбору и секретар НС Желько Ковач и Таня Арва Планчак.
