БЕОҐРАД – За остатнї даскельо роки число автошколох у Сербиї зменшане з 950 на 430, прето же вше менєй гражданох видвоює пенєж за покладанє вожацкого испиту. Пре условия окреме нєзадовольни автошколи з цалей Сербиї, чийо представителє вчера, 17. априла, отримали протестне воженє по Беоґрадзе.
Як пише Бета, у главним городзе транспорт бул блокировани од Автокоманди по Славию. Представителє автошколох револтовани прето же Министерство нукашнїх дїлох нє прилапело їх предкладаня за нови Закон о безпечносци транспорту.
После прешлих вименкох Закона звекшани цени покладаня вожацкого испиту и зменшане число автошколох, а з найновшима вименками ше обчекує ище менше число покладачох, цо ознова значи гашенє автошколох.