БЕОҐРАД – На шветочносци з нагоди означованя Медзинародного дня мацеринского язика, хтора отримана вчера, 21. фебруара у Беоґрадзе, участвовали и Руснаци. Спред нашого Националного совиту (НС) присуствовали членїца Совиту и предсидателька його одбору за образованє Мелания Римар, членїца НС и директорка керестурскей Школи „Петро Кузмяк” Хелена Пашо Павлович, директорка НВУ „Руске слово” Мартица Тамаш и школярка 5. класи керестурскей Школи Минеа Югас, котра рецитовала по руски.
После привитних словох директорки Канцелариї за людски и меншински права Сузани Паунович, представителє националних меншинох рецитовали, лєбо шпивали на своїм язику. Руску националну заєднїцу представела Минеа Югас котра, облєчена у руским народним облєчиве, рецитовала по руски. На програми и Дзецински хор „Чародїйство („Чаролија”) шпивал препознатлїви, народни шпиванки на язикох националних меншинох.
На концу програми Сузана Паунович додзелєла Подзекованя медийом за доприношенє у промовованю людских и меншинских правох, а медзи добитнїками и нашо тижньово новини „Руске слово”.
