У новшим чаше и у городзе и на валалє жени, а тиж так и хлопи, окремну увагу пошвецую свойому физичному випатрунку и то добре обачела и вихасновала Єлена Мали. Вєшенї отворела козметично-естетични салон и потераз ше то указало як добри поцаг.
Нєшка ше людзе вше баржей интересую же чи им скора досц зацагнута, мегка и здрава, и як най то посцигню кед нє так. Козметично-естетични салони каждодньовосц у вельких варошох, док су на валалє нє так звичайни, бо ше рахує же у валалє углавним жию людзе хтори ше занїмаю зоз польопривреду и нє водза тельо рахунку о скори, нохцох лєбо власох, а у варошу же жию праве тоти хторим физични випатрунок важни и хтори провадза даяки шветово тренди.
Медзитим, тераз ше то виєдначело, та чежко за валалски дзивчата нє прекоментаровац же су як бабки, а и старши панї ше нє даю роком.
Млада Коцурска Єлена Мали препознала таку потребу у своїм валалє и надумала отвориц козметично-естетични салон у своїм обисцу. Салон „Квин” функционує од єшенї, а Єлена ше цеши же то бул добри поцаг, бо по тераз интересованє задоволююце.
РОБИ ТОТО ЦО Ю ИНТЕРЕСУЄ
– Зоз козметику и естетику сом ше сцела занїмац такой после основней школи, медзитим, уписала сом ше до ґимназиї думаюци же одлучим дацо инше кед ю закончим. Вше сом провадзела козметични тренди, и то ми по нєшка остало цикаве, та сом такой после штреднєй школи закончела и козметично-естетични курс, дзе сом за коло штири мешаци звладала технїку шминканя, маникиру и педикиру, козметично-естетичних третманох твари, депилациї и подобних технїкох за прикрашованє и оплеменьованє скори и цела – гвари Єлена.
Роздумуюци о тим же кажде треба же би водзел рахунку о своїм фузичним випатрунку, и провадзаци потреби младих у валалє, Єлена надумала же отвори салон у валалє. Понеже жиє блїзко при центре, обисце єй було идеалне место за таке, та у догварки з родичами, єдну просторию дома ушорела до салону. Алє, добре роздумала скорей як принєсла одлуку.
– Двоєла сом ше на початку же чи пойсц до варошу зоз своїм понукнуцом, чи остац на валалє. Правда же у варошу мож вецей наплациц за даяки третман, лєбо же єст вецей людзох хтори нащивя салон, алє анї так ше нє можем поносовац. Ту на валалє нє мам таку моцну конкуренцию яку бим мала на варошу, а и дома сом, та нє мушим плациц жедляренє.
Кед сом шицко поздавала, превагла идея же бим остала у валалє за початок, же бим ше и сама дакус научела, нє бежала опрез друка, и вера же сом нє побановала, бо интересованє досц вельке – бешедує Єлена.
ПРИХОДЗА МЛАДИ, СТАРШИ, ЖЕНИ И ХЛОПИ
Вона гвари же за свойо понукнуца нє бере вельо, и склада ше же у векших салонох єст и прейґмирни цени. Реклама єй нє потребна, кельо позитивни коментари, прейґ хторих людзе и чую за ню, препоруча ю, а до єй салону уходза як млади, так и старши жени, та и хлопи, хторим подєднак важне випатрац добре.
Потолковала нам и як дойсц до позитивних коментарох.
– Наисце ше намагам буц добра у своєй роботи, же би кажде бул задовольни. Кед о скори слово, потребне хасновац квалитетну козметику, же би нє було нїяки нєжадани ситуациї. Ту и шминка хтора, розуми ше, муши длуго потирвац кед дакого нашминкам за даяку подїю. Вше провадзим тренди, нащивюєм сайми и семинари, же бим була у цеку – гвари Єлена.
Малийова цикави приклад младей особи хтора нє жалує за животом у варошу и нє пакує куфри такой по законченю школи, та одходзи з валалу, як цо то тераз звичай. Правда же там лєгчейше дойсц до свойого фалата колача, и найсц яку-таку роботу, алє ше, як випатра, шмели и знаходлїви можу вибориц и у валалє.
– Затераз сом окреме задовольна зоз моїм животним поцагом, и нє бануєм же сом так поступела. Уложела сом до салону, правда, алє ми ше видзи же бим индзей мушела уложиц ище вецей и вибориц ше зоз конкуренцию. Медзитим, кед будземе патриц надалєй, любела бим ше познєйше прешириц, та отвориц єден векши салон, у хторим будзем понукац шицко цо єден салон за прикрашованє може понукнуц – заключела Єлена.
ПЛАНИ ЗА ПРЕШИРЕНЄ
– Кед ше витворя можлївосци и плани, попри тим цо я робим, заняла бим и єдну фризерку, окремну шминкерку, як и нєзаобиходну особу хтора ше занїма зоз ушореньом нохцох, лєбо бим мала и солариюм. Лєм ошацуйце дзивки на улїчки, та похопице же цо им важне и потребне – гвари нам Єлена Мали, док ушорює твар єдней младей особи и роздумує о будучносци.
