СЕРБИЯ – Найвекши процент нєзанятих у Сербиї то млади од 25 до 29 роки, цо углавним значи же то млади котри закончели факултети, а после шлїдза млади од 20 до 24-ох роки, визначене на Привредним форуме младих у Привредней комори Сербиї.
Як преноши Танюґ, Сербия уж 20 роки перша у реґионє, а друга у швеце по числу младих образованих людзох котри ше виселюю до иножемства. По словох координатора проєкту „Привредни форум младих 2015“ Владимира Радуловича, тренд звекшованя числа нєзанятих младих тирва од 2008. року и нєт нагадованя же ше застанови. Вон апеловал на державу же би поробела дацо по тим питаню.
Велька хиба у Сербиї то же ище вше нє принєшени национални рамик квалификацийох, хтори би мал реґуловац реални потреби за одредзенима профилами. На тот способ би ше ришело проблем уписних квотох, понеже по терашнїх, випада же ше велї млади школую за занїманя хтори у Сербиї „нє постоя“, лєбо ше за одредзену професию школує векше число од потребох тарґовища роботи, гварене на сходзе.