ВЕРБАС – Вчера, на Други дзень Велькей ноци, у парохиї Покрова Пресвятей Богородици у Старим Вербаше Служба на 10 г. була Архиєрейска, понеже ю предводзел наш владика Георгий Джуджар.
– Славиме нєшка Други дзень воскресеня Христового, швето над шветами, и торжество шицких торжествох. А наша вира до воскресеня Христового то найвекши дар, найвекши скарб хтори може мац кажда людска особа. Буц християн то значи вериц, и то вериц з прешвеченьом же єдинородни син вжал на себе шицки грихи цалого людства, однєсол їх на криж и на крижу зоз своїм церпеньом и шмерцу знїщел – визначел владик у казанї.
После обидвох службох було мированє, у Служби на 10 г. вирних мировал владика, а парох о. Алексий Гудак з тей нагоди подзековал владикови на нащиви, а тиж и учительки Славици Мали, котра з дзецми пририхтала пасхалну виставу отворену од вчера.
У парохиї Св. Владимира у Новим Вербаше вчера Служба була на 9 г. а по Служби виронаучни дзеци отрималу Вельконоцну програму, хтору з нїма пририхтала шестра Венямина з манастиру у Новим Вербаше.
