ВЕРБАС – Представителє Оддзелєня за дружтвени дїялносци Општинскей управи Вербас участвовали у роботи семинару з тему „Унапредзенє сотруднїцтва локалних самоуправох з орґанизациями цивилного дружтва и транспаретне буджетске финансованє їх активносцох”.
Семинар орґанизовала Канцелария за сотруднїцтво з цивилним дружтвом, з потримовку УСАИД, а попри з Вербасу, на їм участвовали представителє локалних самоуправох з Бачу, Бачкей Паланки, Бачкого Петровцу, Нового Саду, Србобрану, Темерину, Жаблю, Индїї, Сримскей Митровици и других.
Як сообщене з Оддзелєня за дружтвени дїялносци Општинскей управи Вербас, Влада Републики Сербиї принєсла „Напрямки за уключованє орґанизацийох цивилного дружтва до процесу приношеня предписаньох”, хтори поблїжей дефиную принципи, стандарди и уровнї участвованя цивилного дружтва як партнера у демократизациї дружтва у цалосци.
Вони ше одноша и на учасц цивилного дружтва у пририхтованю, приношеню и провадзеню витворйованя предписаньох, як предусловия за запровадзованє реформох, а у процесу приношеня предписаньох, локални самоуправи обовязни почитовац начала зоз спомнутих напрямкох.