ЗЄДИНЄНИ НАЦИЇ – Гоч ше за остатнї двацец роки вельо робело на виєдначованю хлопох и женох, дотераз анї єдна зоз 189 державох хтори прилапели план за посцигованє єднакосци медзи женми и хлопами то нє посцигла, виявела директорка Аґенциї Зєдинєних нацийох (ЗН) Пумзиле Мламбо-Нґцука.
Напредованє обачлїве у обласци здравя и образованя женох, алє нє и кед слово о политики, бо нєшка менєй як 20 жени на чолє держави, або влади, а число посланїцох ше звекшало з 11 на 22 одсто, цо, як оценюю у ЗН, мале напредованє.
Мламбо-Нґцука за новинску аґенцию „Асошиейтед прес“ гварела же треба зопрец насилство над женми и доминацию хлопох, цо постало „ґлобални феномен“. ЗН поволали влади же би викоренєли родну нєровноправносц и то у 12 обласцох, хтори уключую здравство, образованє, обезпечованє роботи, учасц у политичним живоце и людских правох, по хторих жени маю право контроловац и свою сексуалносц и одлучовац кеди и чи буду мац дзеци.