ЗОМБОР – У Городскей хижи у Зомборе вовторок, 28. априла шветочно подписани Меморандум о розуменю, добрих намирох и сотруднїцтве у обласци защити жертвох тарґовини з людзми медзи зомборскима институциями, и у присутве представительох державних институцийох з тей обласци.
Меморандум подписали чолнїки Городу Зомбор, Центру за социялну роботу, Дому школярох штреднїх школох, Дому здрвя „Др Дьордє Лазич”, Общого шпиталю „Др Радивой Симонович”, Националней служби за обезпечованє роботи, Червеного крижу и Полицийней управи Зомбор, и з нїм ше обовязали на институцийне сотруднїцтво у тей зложеней обласци, вше присутнєйшей и у Заходнобачким округу.
Понеже и керестурска Школа од скорей уключена до тей проблематики прейґ семинарох, на шветочносци були и директорка Школи „Петро Кузмяк” Хелена Пашо Павлович и єй заменїца Мария Шанта.