ДЮРДЬОВ – Означованє Националного швета Руснацох у Дюрдьове после шветочней програми у Основней школи „Йован Йованович Змай” предлужене зоз традицийним поставяньом заставох Републики Сербиї, Покраїни Войводини и нашей рускей застави з гербом. Поставени су, як и вше потераз, на будинок Општини, Рускей школи и Културно-уметнїцкого дружтва „Тарас Шевченко” дзе традицийно на 12 годзин почала шветочносц.
Пред програму тамбурови оркестер одграл гимни Републики Сербиї и шветочну писню Руснацох, а потим Микола Кухар, координатор Подручней канцелариї у Дюрдьове, привитал госцох медзи котрима були Борислав Сакач, предсидатель Нацоналного совиту Руснацох и Чедомир Божич, предсидатель Општини Жабель котри и винчовали Дюрдьовчаньом тот значни дзень за Руснацох. У програми Наташа Хромиш пречитала часц з историї Руснацох, а потим вєдно з членами рецитаторскей секциї Дружтва, з Милицу Михальовски и Марину Барна, пречитала писнї дюрдьовских писательох котри гуторя о Руснацох дакеди, алє и о сучасних часох у Дюрдьове и околїску. После програми пририхтани коктел на котрим послужени велї руски национални єдла котри пририхтали членїци УО Дружтва и жени членох того УО.
По красней хвилї на означованє Дня Руснацох пришли велї гражданє. Медзи нїма були и Миломир Шайтош, предсидатель УО Заводу за културу войводянских Руснацох, Радован Чолич, предсидатель СО Жабель, о. Михаил Холошняй, Вукица Петрович, директорка валалскей ОШ и заняти, члени Церковного одбору при грекокатолїцкей церкви, УО Ловарского дружтва „Дюрдьов”, як и велї други.
Програму пририхтала Подручна канцелария Националного совиту Руснацох зоз шедзиском у КУД „Тарас Шевченко”.
