РУСКИ КЕРЕСТУР – Здруженє гражданох „Пакт Рутенорум”, у рамикох Медзинародного волонтерского кампу, орґанизує журку „Pact On” на хторей наступя – Yung Naik & Ann Proify, Flowtech & Yang.tuna, и кавер бенд Rahela.
Журка будзе отримана на соботу, 19. юлия, на керестурским базену, а Пактовци з тей нагоди поволую любительох панк-рока, гип-гопу, техна и драм енд бейса, же би ше им придружели и вєдно направели добру атмосферу.
Журка почнє на 21 годзин, а уход за шицких шлєбодни.
Ґу тому, члени Пакту обявели и розпорядок активносцох за спомнути Медзинародни волонтерски камп, хтори почал пондзелок, та за нєшка, 17. юлий, од 15 годзин, у плану ушориц терен за одбойку на писку на базену, будзе ше и фарбиц лавочки на базену, а у плану покласц и табли зоз надписами за загрожени файти животиньох и рошлїнох на териториї цалого валалу.
Ютре, пияток, вєдно зоз домашнїма огньогасцами, волонтере буду залївац древка на даскелїх локацийох у валалє, на соботу будзе журка „Pact on”, а на нєдзелю, од 17 годзин, будзе орґанизоване зберанє шмеца коло беґелю.