НОВИ САД – Радио-телевизия Войводини 18. новембра у своїм будинку на Мишелуку означела пейц децениї роботи Другей програми телевизиї – редакцийох на словацким, руским и румунским язику.
Була то нагода же би ше през розгварки редакторох з госцами на панелу кажда спомнута редакция окреме здогадла на початки алє и континуитет Другей програми телевизиї.
Ґенерални директор Явней медийней установи Радио-телевизиї Войводини, Ґоран Караджич медзи иншим гварел же и попри тим же ше розликую по язику, култури, обичайох и вири, заш лєм шицки маю єден исти циль – направиц актуалну, квалитетну професийну и ориґиналну програму, а при тим пестовац и чувац свой мацерински язик. Лєм влонї три редакциї направели вецей як 160 тисячи минути програми, кажда по коло 55 тисячи.
Андреа Югас, о. д. главного и одвичательного редактора ТВ2 Радио-телевизиї Войводини визначела же тот ювилей доказ длугорочней мисиї Явней медийней установи РТВ же би була дом шицким заєднїцом и же би каждому дала простор за информованє на тим язику хтори розуми и чувствує го як свой.
На концу визначним госцом, институцийом и установом додзелєни подзекованя за длугорочне сотруднїцтво.
