РУСКИ КЕРЕСТУР – Керестурци и тот Нови рок могли дочекац вєдно у центре валалу, понеже, предлужуюци вецейрочну традицию, Месна заєднїца и того 31. децембра вноци орґанизовала заєднїцки дочек Нового року. Пред пол ноци почало пущанє музики, а на пол ноци виштрелєни и красни огньомет.
Пре моцнєйшу жиму на тим заєднїцким дочеку було менєй людзох як скорей, котри ше дакус повешелєли у центре, було и нєзаобиходного штреляня петардох, а могли ше зограц и з вареним червиним вином, хторе за тоту нагоду обезпечел керестурски таксиста и член Совиту Месней заєднїци Янко Мудри.
Нови рок у Керестуре бул орґанизовани и у трох погосцительних обєктох – у ресторанох „Червена Ружа” и „Лонґов”, як и у Дискотеки „Амадеус” у Доме младежи, дзе и ютредзень орґанизовани „бичак”, алє вшадзи було менєй госцох як скорейши роки. Було Керестурцох и на на площи у Новим Садзе, алє векшина тоту ноц препровадзела дома.
У керестурскей церкви на пол годзини по пол ноци служени традицийни новорочни молебен.
