1. ЮНИЙ – На нєшкайши дзень народзени Мирон Жирош (1936–2016).
1198 – Ромейски (византийски) цар Алексий Ангел дошлєбодзел сербскому велькому жупанови Стефанови Неманьови и його синови монахови Савови на руїнох Гиландариона подзвигнуц нови манастир на Святей Гори. Сербски манастир Гиландар, котри вони двоме основали месце дзе були руїни греческого манастира, постал скарбнїца културно-историйного и уметнїцкого блага, єден зоз штирох найкрасших и найвекших на Святей Гори и виками бул стредзиско и розсаднїк сербскей духовносци.
1479 – Основани универзитет у Копенгаґену.
1866 – Коцур достал пошту, хтора була у будинку такволаней Валалскей хижи. Пошвидко Пошта мала и Морзеов телеґраф и индукторску централу. После Другей шветовей войни пошта преселєна, а 1972. року добудована нова часц будинка и автоматизована телеґрафско-телефонска вяза.
1936 – Народзел ше учитель, правнїк, публицист и длугорочни новинар Рускей редакциї Радио Нового Саду Мирон Жирош (Руски Керестур, 1. юний 1936 – Казинбарцика, Мадярска, 29. новембер 2016). По законченей Учительскей школи у Зомборе Мирон Жирош службовал у дюрдьовскей и керестурскей школи. Потим закончел Висшу управну школу у Новим Садзе и кратши час робел як правнїк, а вец як новинар Руского слова, потим бул управитель Землєдїлскей задруґи „Перши май” у Руским Керестуре. Кед ше преселєл до Нового Саду робел на Радио Новим Садзе як новинар-редактор полни 25 роки, одкаль пошол и до пензиї. У Новим Садзе ше уключел и до дружтвено-политичней активносци. Вецей роки бул член Управного одбору КУД Максим Горки, член Комисиї за животни стандард Дружтва новинарох Войводини и Союзу новинарох Югославиї. Єден час бул и предсидатель УО Фонду заєднїцкого трошеня РТВ Нови Сад, делеґат РТВ НС у Скупштини Югославянскей радио-телевизиї, бул и судия-поротнїк у Окружним судзе у Новим Садзе. Як радийски новинар Жирош писал прилоги и ушорйовал Радио новини, потим Емисию за валал, и емисиї з нашей прешлосци Давно, давно то було и Драги нашого живота. Од пензионованя жил у Казинцбарцики у Мадярскей, а свойо публицистични и други твори и надалєй обявйовал у наших медийох и публикацийох. Мирон Жирош умар у Казинбарцики, 29. новембра, поховани є 2. децембра, на грекокатолїцким теметове у Мучоню, у Мадярскей.
1980 – Порушана кабловска телевизийна мрежа Си-Ен-Ен (Cable News Network – CNN), америцки 24-годзинови информативни канал у власнїцтве Ворнер Брос. Дискаверия (Warner Bros. Discovery).
1990 – Предсидателє Совєтского Союзу и ЗАД, Михаил Ґорбачов и Джордж Буш, подписали спорозуменє о законченю продукциї хемийного оружия и знїщованю резервох того оружия до 1992. року.
Шветови дзень млєка запровадзела Орґанизация за поживу и польопривреду (Food and Agriculture Organization – FAO) Зєдинєних нацийох.