Дружтво, школа и околїско найчастейше инспирация и за емисиї, и за рубрику хтору вєдно пририхтую Леа и Анамария Ранкович, лауреатки „Заградковей” награди.
Дворочна награда Часописа за дзеци „Заградка”, котра ноши мено Михайла Ковача, того року додзелєна Леи и Анамариї Ранкович, авторком рубрики Радио у Заградки. През тоту едукативну, забавну и визуално прицагуюцу рубрику, вони два указую винїмкову креативносц и пошвеценосц, порушую любопитлївосц и креативне роздумованє при дзецох и так источашнє доприноша квалитету часопису.
Цо сце подумали кед сце чули же праве вам будзе додзелєна награда за найлєпши авторски тексти, активносц и иновативносц у Часопису за дзеци „Заградка” за период од 2024. по 2026. рок?
Леа: Наисце зме ше нєсподзивали. Награда значи же препознали кельо ше трудзиме.
Анамария: Велька нам чесц же зме достали награду хтора ноши мено Михайла Ковача, чловека чийо твори формовали числени ґенерациї дзецох и же зме у дружтве потерашнїх лауреатох. То ноши зоз собу вельку одвичательносц. Од початку зме рубрику Радио у Заградки правели з вельку любову ґу дзецом и рускому язику и скарбу.
Як пришло до сотруднїцтва медзи вашу радийску Емисию за дзеци и „Заградку”?
Анамария: Влєце 2022. року, кед зме превжали ушорйованє Емисиї за дзеци, порядно зме сотрудзовали зоз редакторку „Заградки” пре заєднїцку обласц зоз хтору ше занїмаме. Требало нам лєм пейц мешаци же бизме видзели же подобнє роздумуєме и же маме громаду идеї хтори чкода же би остали лєм у етру. Барз зме подзековни же нас у децембру истого року поволала же бизме сотрудзовали.
Леа: То за нас була єдна нова спокуса!
За тоти вецей як три роки порядного сотруднїцтва, у „Заградки” вам обявени вецей як трицец тексти, чийо теми прилагодзени друкованому виданю и обробени на иншаки способ як у спомнутей радио емисиї. Чи чежко прилагодзиц радийску емисию друкованому медию и на яки способ то робице?
Леа: То нє лєм преписованє емисиї на папер.
Анамария: На радию, у етру важни звук, музика, атмосфера, та аж и цихосц. На паперу треба пренайсц други способ же би тема була интересантна. Попри тим, Емисия за дзеци идзе углавним штири раз до тижня, а „Заградка” раз до мешаца. Вєдно зоз редакторку вше вибереме єдну тему и вец ю представиме през даєдни информациї зоз емисиї и додаме задатки, квизи, бависка и илустрациї же бизме дочаровали розвагу и емоциї хтори уношиме до емисиї.
Хтора яки ма задлуженя, и у правеню емисиї, а и рубрики у „Заградки”?
Анамария: Я найчастейше робим виглєдованє и направим концепт, пишем сценарио и тексти, бешедуєм зоз дзецми по наших местох и после монтирам їх вияви и цалу емисию, односно дизайнуєм рубрику.
Леа: Я участвуєм у вибору темох, давам идеї, тестирам задатки и квизи, и помагам коло дизайну. Дакеди идзем и на терен, та тиж знїмам вияви дзецох о даєдней теми.
Анамария: Мож повесц же и емисия и рубрика рошнє зоз ню, бо єй дружтво, школа и околїско найчастейше инспирация и за емисиї, и за рубрику. Вшелїяк вельо доприноши зоз свою дзецинску енерґию, перспективу, способом виражованя и, єдноставно, зоз свою розбавеносцу.
Чи ше дакеди и нє складаце коло даєдних идейох?
Анамария: Розуми ше! Окреме кед слово о приступу ґу даєдней теми. Мнє ше дакеди видзи же сом ю наисце прилагодзела ґу дзецом, а вец випаднє же анї нє так.
Леа: Часто маме цалком розлични думаня, алє то так и треба, и прето часто найдземе лєпше ришенє.
Рубрика Радио у Заградки, попри тим же дзецом промовує и други медий по руски, препознатлїва и єдна з облюбенших медзи читачами. Кажду тему пошвецено обдумуєце и обрабяце на креативни и ориґинални способ, а попри тим же пишеце тексти, сами и дизайнуєце тоту рубрику. Дзе пренаходзице инспирацию и як сце одлучели же бисце цалу рубрику сами ушорйовали?
Леа: Инспирацию пренаходзиме вшадзи коло себе: у розгваркох зоз дзецми, у школи, у кнїжкох, у природи, у науки, у обичайох и шветох.
Анамария: Важне нам же би кажда тема була интересантна, алє и едукативна. Понеже зме уж два у процесу креированя (а кажда цага на свой бок), лєгчейше и швидше кед перше „наруцаме” на папер цо нам главна нїтка одредзеней теми и вец помали елиминуєме през дизайн. То у початку наисце креативни хаос, алє помали ше викристализує випатрунок.
Чули зме же Леа уж тераз пише и свою кнїжку. О якей кнїжки слово и кеди зме ю годни читац?
Леа: То кнїжка о нєзвичайних и нєвироятних авантурох єдного дзивчеца. Пишем ю помали, кед мам часу. Нє знам кеди будзе готова, алє верим же ю єдного дня годни пречитац и други дзеци. Сцем пременїц велї ствари и думам же кед то поробим, же ми кнїжка будзе вельо лєпша!
КЕДИ И ДЗЕ МОЖ СЛУХАЦ ЕМИСИЮ ЗА ДЗЕЦИ
Каждей соботи на Програми на руским язику РТВ (92, 100, 107,1 МHz) на 12 годзин и 30 минути, а репризно каждей нєдзелї на 6 годзин и 30 минути. Мож ю слухац и одложено на интернету на сайту Радио-телевизиї Войводини media.rtv.rs/rsn/radio. Там вибереце опцию Емисиї на руским язику, а вец пренайдзеце банер Емисия за дзеци.