МИКЛОШЕВЦИ (ГОРВАТСКА) – У Подручней школи Миклошевци, отримана пригодна програма з нагоди 20 роки як збудовани нови школски будинок.
У програми, хтора отримана пополадню пияток, 19. юния участвовали школяре подручней школи. Присутних привитала директорка школи Марина Балич, вона здогадла на факти зоз историї школи, єй учительох и визначела значносц роботи длугорочного учителя Дюри Лїкара хтори историю школи записал и документовал у кнїжки 155 роки школства у Миклошевцох чия промоция отримана на дзень кед святочно отворени нови школски будинок 2006. року.
Школяре ше представели зоз шпиванками, кратку драмску сличку, а направени и документарни филм о школи На фундаментох наших памяткох хтори порихтали школяре, менторка була учителька руского язика и култури Леся Мудри. Тиж так, була то нагода же би ше учителька Мария одпитала од своїх школярох Ребеки и Шимуна хтори закончели штварту класу.
Нєшка у миклошевскей школи робя два учительки, маю шесцеро школярох од першей по штварту класу, а на виборней настави руского язика и култури єст 13 школярох од першей по осму класу.
На програму пришли учителє, родичи як и бувши школяре, а з моцним аплаузом потримали успишну роботу.
