Йолана доктока ветеринарскей медицини и попри обрабяня винїци пожадала буц и пчоларка,а же би то витворела допомогло єй участвованє у вибераню меди з ладох у родзини у Шаренґраду при Илоку. Планує на яр рушиц и продуковац мед за потреби фамелиї.
Одход з мацеру Андєлку до родзини до Шаренґраду, валалу на Дунаю при Илоку на вибераню меду з ладох, дацо цо Йолани Шовань, докторки ветеринарскей медицини зоз Шиду нє лєм у красних памяткох алє и виволало же би и сама постала пчоларка.
Мирослав Слюка зоз Шаренґраду роками у швеце пчоларства,а на нєдавне виберанє меду з ладох з баґрену, поволал Йолану и єй мацер Андєлку хтори дзечнє пошли нє лєм присуствовац алє и активно участвовац у єдней такей значней роботи за каждого пчолара.
-Першираз сом участвовала у такей роботи и препровадзела шицко од отвераня лади кед ше зоз димом пчоли „розоженю“ на сподню часц лади и вец ше вибераю рами, з ножом знїма восок, знїма саче и вец рами порихтани же би ше покладли до „врцальки“. Ту ше кладзе штири рами и обраца и мед чури на сподок. Нє мала сом упечаток же сом першираз на такей роботи алє сом ше такой прилапела роботи як же сом то уж скорей робела-приповеда Йолана Шовань.
А место дзе лади з пчолами у красней часци на виходзе зоз Шаренґраду у напряме Вуковару и ту єст досц баґрену, лїпи, олєйовей цвиклочки и слунечнїку. Наша собешеднїца додава же мала, як то и швечи каждму пчоларови окремни шмати и рукавици и калап з мрежочку же би була защицена же би ю пчоли нє покусали. Алє як гвари, пчоли були мирни и таки проблеми нє було и шицко добре прешло.
Кед ше до лади врацали празни рами, пчолом ше давала и покарма и то ше як гвари роби кед им ше вежнє мед. Полна упечаткох, Йолана принєсла и єдну значну одлуку,а то же би и сама була пчоларка.
-Мнє ше шицко то барз попачело и прето сом пожадала же бим и сама мала пчоли. Знам же то нє легка робота алє досц научим ище о допатраню пчолох и любела бим кед би уж з яри 2027. року у свой винїци мала дас пейц лади. За початок же би було меду за свою фамелию. Остарам ше порихтац цо шицко потребен,а Мирослав ми да єдну „матку“ зоз пчолами же би було формованє пчолове дружтво у єдней лади и так рушим. Доокола коло винїци єст досц лїпи, баґрену, слунечнїку и ту и ливади таке же будзе пчолом и добра паша-гвари Йолана Шовань и додава же пойдзе до Шаренґраду и кед ше нєодлуго будзе виберац мед зоз лїпи.
Одмалючка пчолар
У швеце пчоларства и 13-рочни Никола Лучич зоз Шиду. Його зме стретли на пияцу у Шидзе кед почал лєтни школски одпочивок, та Никола, хтори закончел седму класу основней школи, вихасновал шлєбодни час дацо и заробиц.
– Мой дїдо длугорочни пчолар и ма коло 100 кошнїци хтори трима у фрушкогорским валалє Моловин. Дзекуюци йому, вошол сом до швета пчоларства и уж мам свойо 10 кошнїци о хторих ше старам и продукуєм мед. Продукуєм лїпов, баґренов, пажицов мед, а тиж и прополис. Мед кошта 1.000 динари за килу и з оглядом на тото же є квалитетни, добре ше и предава – гвари Никола Лучич.